वीरगन्ज । वीरगन्ज महानगरपालिकाले धार्मिकस्थल र शिक्षण संस्थाका भवनमा मदिरा र सुर्तीजन्य पदार्थको बिक्रीवितरणमा राेक लगाउने भएकाे छ।
आइतबार बसेकाे महानगरपालिकाे बजार व्यवस्थापन तथा अनुगमन समितिकाे बैठकले महानगरमा रहेका मठमन्दिर,मस्जिद,विद्यालय र क्याम्पसकाे भवन र जग्गामा मदिरा र सुर्तीजन्य पदार्थकाे बिक्रीवितरणमा राेक लगाउने निर्णय गरेकाे हाे ।
बैठकमा स्वास्थ्य ऐन अनुसार मठमन्दिर र शिक्षालयको वरिपरि पाँच सउ मिटरसम्मकाे क्षेत्रमा मदिरा र सुर्तीजन्य पदार्थ बेच्न नपाइने बिषयमा गहन छलफल भएपनि हाललाइ विद्यालय,क्याम्पस तथा मठमन्दिर, मस्जिद जस्ता धार्मिकस्थलका भवन र जग्गामा मदिरा र सुर्तीजन्य पदार्थको बिक्रीवितरण र कारोबारमा रोक लगाउने निर्णय गरिएको छ ।
बैठकले महानगरमा रहेका सहकारीहरुको अनुगमन अझ प्रभावकारी बनाउने ,अनुगमनको क्रममा दिइएको निर्देशन पालन भए नभएको बारे बुझ्ने , निष्क्रिय सहकारीहरुलाई खारेजिको प्रक्रियामा लाने र विद्यालयहरुको पनि अनुगमन गर्ने निर्णय गरेको छ ।
बैठकमा महानगरका प्रमुख प्रशासकीय अधिकृत मातृका भट्टराई , खाद्य अनुसन्धान अधिकृत बिपिन कुमार दास ,वडा प्रहरी कार्यालय विर्ताका प्रहरी निरअंक्षक पुष्कर बाेगटीमुख, उपभोक्ता मन्चका अजित भुजेल लगायतकोपनि सहभागीता थियो ।
